هادي محاولة في الزجل بمشاركة الصديقة والأستاذة رحيمة بلقاس في اطار التنمية والارتقاء بالذات الشاعرة ،
الصبر كيضبر
سمعت الصبر كيضبر
ومنين ذقت مرارو
لقيت شوكو خنجر
على وجه العمر كيراري
وعلى خذي شرط حفاري
●●
انا في واد نلالي
وهو في السما ينادي
مالك يا محايني
علاش بالذات
انا لي اختاريتني
وف ارضي
حطيتي رحالك
●●
واش انا نسيتك !!
و بغيتي تفكريتي ؟
بللي العمر قصير غادي
يمكن من نفيقو نلقاوه فات
والقبر بنواحو يشالي
شاهدو من بعيد بان لي
●●
ياك قالوا :
"راه الهم يخرج بغنانو"
وانا همي غرس وتادو
ركب عنادو
ياك قاسيت الليالي بسبابو
وباقي واقف على بابي
يمضي سنانو و ظفاروا
●●
وا حلفت بحلوفي
نلجم خوفي
وما ندير خيمة
ما ندق وتادها
وما نركب بهيمة
ما نسرج دهماتها
●●
واتا بين غيامك يا سما
نمشي تالفة
نعد ضربات الزمان
مانحسبش الايام الفايتة
إلى مشات تجري
من بين يدي لاهتة
ورمات فتتاتها
رمل ف عيني
عماتني دموعي
بصرخاتها
●●
خليني نحسب دقات قلبي
بعدما خانتو سربات الحمام
وعشعشات في جوفو الغربان
●●
واش نسكت ونصبر
ولا نوقف ونهضر
ولا نرجع للسطر
نعاود حسابي من الاول
يمكن نغير المكتاب
و الآخر يصبح احسن
من اول ...الكتاب..
_______________
الزجالة القادمة "فاطمة لعبدي" ...
توضيب للنشر جميلة محمد القنوفي
من الاول تعاود
ليست هناك تعليقات:
إرسال تعليق