حَبَابْكُمْ عَشْرَة
.............
تلوِّح لي مُدُن عِينيكم السمرا
أقول حِلْيِتْ كمان سهرة
"ألملم قدرتي الباقية
واشد ساعد على المجداف"
واقول يا أنتو يا أغرق
فأغرق في سنين مرِّت هناك ساكنة
ما بين أحمس.... وخال فاطنة
أقيف ألقى....
إيزيس بتحنِّي شَعر تَاجُوج
يا تاجوج المحلَّق عاد ..... مِيتين يلقى حنين رِيدَه
يا تاجوج ال قساهُ بُعاد ..... عُمُر كفَّى مِيتين (ريدة)
عشرات حَبَابِكْ ... سلامات
يِسْلم شبابِكْ ..... سلامات
خيلك سنابكْ ..... سلامات
والقُبلي شابكْ ...
القُبلي سابك
سابك ليه؟
يا "لابسة البمبي" ... وين ال كنتي تستنيه؟
بيحلب جمرة الأحزان..... ويتمنى يعود كونُه
"قاعد في صالونُه" ..... بيتأمَّل شجونُه
ويَترجى ف جفونُه ... لكين دمعُه بْيَخونه
يا ثومة فين ...."سلوا قلبي" و "حديث الروح"
تغني لنا شوية .. شوية
عشان تِشفي كَبِد مجروح
بتبكي لمين
ومين يتهجَّى عمر الورد في بغداد
ومين يشرب كاسات الدم في غزة
"أخي جاوزالظالمون المدى"
وإحنا .. العمى في العقول والقلوب
"فحق الجهاد وحق الفدا"
يا شيخ ..
واحنا مالنا ومال الحروب
ـــــــــــــــــــــــ
من قصيدة (حبابْكُم عشْرة) 2004
ليست هناك تعليقات:
إرسال تعليق