يا هالوطن
يا هالوطن صامد ما همو الريح
يمكن تزيح الكاينة من شروشها
لكن إنت
هيهات ما بتزيح
بتختير الإيام
ع حفافي العمر
والعز عالي بقلعتك
يهدر بوج المعتدي ويصيح
يا هالوطن
يا الـ وهج عزمك ما اندمل
ومن القهر
عمَّرت الأمل فوق الأمل
ولما الشمس بتغيب
من خلف الدني
بيطلع قمر ع ترابك
يشتي عسل
يا هالوطن
سلطان قلبك ما قلب
والعز من نبعك
غَرف مَيْ وشِرِب
ولما بعتم الليل
تطلع صرختك
بتصير تضوي شموس
ببلاد العرب
يا هالوطن
ما ضاع حقك
ما هرب
سيفك جلا
سيفك علا
سيفك ضرب
المجد اللي عرّش
فوق روس جبالنا
بيضل أغلى مجد
بكتاب انكتب
من حد ريف العين
مرقت غيمتك
وزخة عطر ع الريح
تمطر ديمتك
ولم البطولة تصرخ
تنادي تعو
بشوف المجد
راكض تـ ينصب خيمتك
ولما إله الكون
كوّن هالدني
خرطش بحبر العتم
ورقة ملونة
صار الشعر
ينزف مدن
يكتب دول
وكنت القصيدة
غالية ومولدنة
ويا هالوطن
يا الـ زلغطوا عيونك
متل رف الحمام
جن الهوى
والليل مش عارف ينام
وفار العشق بالقلب
متل العاصفة
وصار الشعر يكرج
على عتاب الكلام
د. علي عجمي
(في تقديم أمسية الشاعر الأب فاخر موسى في المركز العربي الأميركي للثقافة والفنون)
ليست هناك تعليقات:
إرسال تعليق