بقلم محمد عبد المنصف

سذاجة حلم 

 هجرت الشعر والشعراء
 وليل الفكر والحيره
 وقلت أبعد عن المنطق 
ويالا نفضها سيره 
ها ناخد إيه من الدنيا ؟ 
كفايه إسمها ( دنيا) 
وشوف حال البشر فيها و
كام بيموتوا فى الثانيه
 وقلت لعقلى خد راحه 
وعيش أيامك الفانيه 
بنبنى سنين فى أوهامنا 
جبال م الرغبه قدامنا 
خيال واهم  
فى عدل يصون 
وينصف ضُعف أحلامنا
 خيال واهم 
هاييجى رسول 
يصحح دينه أفهامنا
 لقيت الغول ماسك أرغول 
وماشى يغنى ويقول 
جريتوا قد ما جريتوا 
بحور م الدم عديتوا 
وفكرتوا الكابوس انزاح ؟ 
دا حلم جعان
 فى عيشه براح 
خد وقته وعدى وراح
 ورجعت ريمه للطبله
 ياناس هبله
 مافيش أسهل من التطبيل 
وعيشه هنيه فى المواويل 
وعيش يابنى فقير كحيان
مدام البوم مع الغربان 
بقوا يغنوا فى كل مكان
 ولو مليتوا م الخنقه 
وارض الله بقت زنقه
 بلاش م الميه هاتلاقوا
 قروش وحيتان 
ودى مش نفس مكسوره 
ولا قرفان من الصوره 
مدام جى بكره حساب 
هانستنى  
يكون مثوانا فى الجنه 
وكفايه عذاب 
*********
محمد عبد المنصف