بقلم محمد المؤدن

مالك يا هاذ الزمان
المكفس والمعكس
شي عطايتيه لابس
وشي بك مكرفس
شي ناعس وكالس
شي جاري تاعس
قيمة بنادم الفاهم
طاحت ولات  فلس
مول لفلس ما هاني
راسو عامر موسوس
ولمزلوط بين لحيوط
مربوط تابعو  النحس
غلبتني يا الزمان
وفاتوني الركبان
قلت نكفد جلايلي
بعكاز نقطع لويدان
من شجرة اللياس
قطعت اغصان
شجرة فيها سوسة
مدسوسة ما تبان
عليهم عكزت وعولت
تهرسو خلاوني غرقان
لاحتني حملة الواد
هربت حفيان
الزلط سلاطة
يعلمك السقاطة
ولعرا يعلمك بلبرة
تخيط الشياطة
مالك يازمان
ظلمت الحرة
خطفت زمانها
ما طول العشرة
على ليتامة خدامة
تخاوات مع الحكرة
شافوها الذياب
طمعو كشرو نياب
رفضتهم هجتهم
عذبوها عذاب
فين القوت
والوقت صعاب
لخياطة نقدتها
كانت ليها اسباب
تخيط رقعة
تسيل دمعة
تحرق ليل ونهار
حريق الشمعة
القفطان فصلاتو
على مولاتو قيساتو
خيطاتو ما لبساتو
بجوج فرانك
خلصاتو وداتو
الثمن ما غطى
 اللي حسباتو
الدنيا شي عطاتو
وشي زواتو كرماتو