بديت باسم الله يا لحباب
السابقة في أول لكتاب
لي سبقها ما يخياب
ولا تلقاه شي أذية...
نكتب ونلخص ف كلام
على من هي لحنينة ف لعالم
وماقاسات من ألام
لخروجي لهاذ الدنيا..
...
شهرها الأول بداها لوحم
وتربيت ليها وسط الرحم
بدات ديما بيا تحلم
والحياة ليها تزهى بيا..
...
را بطنها بدا يوساع
ومن الماكلة دغيا تشبع
حيث الثاني ليها يخلع
والصحة تدهورات شوية..
...
را الثالث ايا لحباب
وليت نتحرك ليها ف جناب
قالت ندير ليه حجاب
ونخليه يتركن شوية..
...
الشهر الرابع راه بان عليها
والكلف ولى يطليها
تطلب الله يكمل ليها
بالولادة الطبيعية..
...
الخامس ليها ف شهور
قللت من المشي والمرور
وبقى وجهها مبشور
هذه هبة ربانية..
...
را ف السادس ليها نونس
وخا النفس ليها نحبس
على راحتي ديما تحرس
وزادت ثقلت شوية..
...
وفي الشهر السابع ليها
ولات تنين والثقل عليها
شكون من غير ربي يواسيها
في هاذ الدنيا..
...
دخل عليها الشهر الثامن
مسكينة ولات غادة وتوهن
ما قدت تصبن وتعجن
ديك الشجرة لعفية..
...
نهار تناص التاسع
ولى يزاورها لوجع
تتحسك وعينها تدمع
وتقول ياربي فك ما بيا..
...
عند القابلة مشى بويا يجري
وخا بعيدة على دواري
نوضي شوفي عمارت داري
حر الولادة أثر فيا..
...
أمي رقية ماردت كلام
ماوقفت حتى ليها قالت السلام
يا ربي ويا خالق الآنام
عليك توكلت مع هاذ الولية..
...
بقات تزحم وراسي راه خرج
والميمة بالغوات ولات تنهج
وربي عليها فرج
وبديت أنا نبكي بكية..
...
خرجت منها غير لحيمة
رغيوة مانعرف هدرة أو تبسيمة
ولات سهرانة معايا ديمة
والعذاب ولى صفحة منسية..
...
من البزولة اعطاتني نرضع
ومن حليبها حتى نشبع
ولبكايا ما بغات تسمع
شحال تهوني و تراري بيا..
...
نطلبك يارب العالمين
تحفظ كل أمهات المومنين
راحنا بإحسانهم مجبورين
والستر منك ف الأخرة والدنيا..
.....
.......أحمد الناصري......
ليست هناك تعليقات:
إرسال تعليق