يا بنادم يا النادم لازم تفهم
بلي أنا خوك ؛ ماشي عدوك
آدم بوي ؛ وبوك مشاركنا الدم
أنا وأنت من أم مشاركنا رحم
يا بنادم علاش غروك هاذوك
بهم الدنيا فعالك مزمة بالقلم
علاش لكذوب علاش الذنوب
علاش لحروب علاش سفك الدم
علاش يا بنادم ؛ فمك مبتاسم
علاش يا بنادم قلبك محجوب
فيه الخديعة والغم عامر بالسم
يابنادم رزقك مقدر في الغيب
احتارم تلي العيب وكون قانع
يا بنادم فينا الهابط فينا الطالع
فينا المسكين فينا الغاني الشابع
مالك أجاري هاز راسك علي معفر
قل السلام الزمان يذوب لعمر
النبي وصانى عليك وحرم لغدر
راعي لجورة علي وعليك بالصبر
بحطبك يالحطاب كنت سباب
الدفا ويدي من الكانون قراب
زينك يافلاح في فدادن لقماح
زينك ف التفاح وعسل لجباح
زينك يا نجار ف صوت منشار
في دق مسمار في بثات الدار
عندك لحق يا مول لورد ولحبق
وردة مهدية لهنية من العاشق
يفتح قلبها يكون عليها شافق
مرض الفلاح ؛ ودواه الطبيب
بنت الطبيب ؛ مرضها صعيب
حارو فيها مادواها عير حبيب
بوه فلاح كبر شانو ولى نسيب
مرض لحبيبة صعيب وصعيب
ما يداويه طب إلا بكلمة الحب
وخاتم ذهب في صبعها يتركب
إلا بغاتك لمرا معك دوم لعشرة
وتصبر في حقها بالحفا ولعرا
كبرت في خيمة مزيناها لميمة
خيمة عظيمة؛ وعايلتها كريمة
وصاونا الكبار ؛ ما نجبدو العار
نحميو الجار ما نرافقو لشرار
دفع الطعام وبعد من لخصام
تبقى راجل عاقل تبغيك قوام
سبقت للخير قلت نبدا بالطعام
حتى مولاة داري فهمت قراري
وفورت وسكات ثلث قصاري
بسبع خضاري ؛ وحدة لدراري
وحدة للنسا وحدة لي وجاري
عرضت على الفلاح يدو نقية
خضاري لقصرية بيدو مسقية
أهيا مول الكربة كب لي شربة
جلس مرحبا كول عتق الرقبة
نشركو الطعام تجمعنا المحبة
يا لعطار لا تقول حرفتك عار
مرحبا بيك كول ؛ عليك النوار
زينك في طاجين غنمي معطر
بمروزية ومسكة وقرفة وبزار
من زين اللمة مع الخالة والعمة
من زين اللمة تجمع فيها الأمة
تكون كل لقلوب بيضا ومسلمة
محمد المؤذن
ليست هناك تعليقات:
إرسال تعليق