بقلم مصطفى دسوقي

و في حضنه راحت تبكي
وتشكي م الأحزان
وعشان يا ناس إنسان
دمع على بكاها
وتاه منه جواها
ومعرفش يعمل إيه
هيواسي نفسه يا ناس
ولا يواسيها
الوردة دبلانه
عطشانه شوق وحنان
بتموت ما بين أحضانه
ودموعه تحييها
ويزيد إحساسها
غصبٍ عنها
ف يخرج قولها
حاربت الدنُيا علشانك وحبيتك
وعاهِدتك وأمَنتك وأمِنتك
وخدتك ضهر يحميني
وحلفتك يمين بالله
تصون العهد
وجيت وحلِفت
١٠٠ ميت مره
تصون العهد
لكنك خُنت
وما جتش الطعنه
غير منك
حاولت أنسي بإنك خاين
وماقدرتش
وحاولت كتير أداوى الجرح
ماعرفتش
وحاولت أنساك لكني فشلت
وآه منك
وآه منك بمليون آه
تشق في قلبي وادي جراح
وتجريه بحر نار جواه
وآه منك بمليون آه
عشان الآها م الأحباب
ماهياش بس قولت آه
وهي فكرها شارد
يرد ورده كان بارد
ما تكلميش نفسك في نفسك
وإحساسك يكون مسموع
ده شئ ممنوع
عشان حسك ده نقطة ضعفك
فداري الضعف جواكِ
ماتظهريهوش
هيهدك آه ويبنيكِ
 لكن جواكِ مش باين
وإيه يعني الحبيب خاين
وإيه يعني الحبيب خاين
ما ميت مليون حبيب خاين
وميت مليون حبيب متخان
وميت مليون قوليب متهان
وشارب مر م الأحباب ومتعذب
وشارب م العذاب ألوان ولا اتكلم
وإيه يعني الحبيب خاين
خلاص غلطه
غلطنا غلطه وسببها
قلوبنا منها تتألم
ولازم إننا نغلط
عشان تاني مره نتعلم
خلاص
فتره في عُمرنا وعديت
بنينا أمالنا واتهدت
لكن ماشيه حياتنا مش واقفه
وعادي هكمل سكتي لوحدي
ومش خايف
ولابد تكونِ مش خايفه
أنا عارفك أنا عارفك
صابوره ومؤمنه بربك
وعارفه قضاءُه ده قدرك
أنا عارفك
وعارف إن أنا بسببي
جراح الدنيا دي في قلبك
لكن عارفك
سفينه في بحرموجُه عالي
بتخبط فيكِ ب العاني
لكنك واقفه بتحاربي
صحيح مليتي وتعبتي
لكنك رافضه تتهزمي
ف بتعافري عشان تنجي
وفاكره حبنا أبدي
وإني الفارس الناقذ
غريقه ماسكه قشايه
وحبك ليا مش مُنجي
فلازم حبنا تنسيه
عشان تكمل حياتك بعدي
لازم حبنا تنسيه
عشان قلبك ماهوش ناقص
بإن أتمادي في القصه
وبرضو حياتنا مش ناقص
فلازم حبنا تنسيه
عشان تكمل حياتك بعدي
 بقلم ‏..مصطفى دسوقي..ش