بقلم الزجال أحمد الناصري

......مالكي يا لليام.....

مالكي يا لليام علينا
شحال فيك لكمنا وعيينا 

اخذيتي لكثير آش عطيتينا؟؟

 من غير هاذ لكميشة....
.......
زرعنا الحبوب بيدينا
والسبول ثامر بان لينا
هم نهبوه وانت رسلتينا
لذاك التبن ولحشيشة....
.......
مالكي يا لليام علينا
ياك فيك الخير تمنينا
تبعناك شي نهار تعطينا
زدتي عاد حررتي لينا العيشة....
........
منك تجينا وليك تدينا
وقطعتي بزولة الرحمة منا
وانت خرجتي نيابك فينا
وخلعتينا بحال ديك الهيشة....
......
مالك يا لليام علينا
حالك غدار ما يداوينا
ووسط فقرك سكنتينا
وولينا ليك كيف  الريشة....
......
ماكلتنا ما لينا بقات بنينة
مع الخليع تخلطت الروينة
ومع جوعنا قلتي راها زوينة
ووهمتينا براك انت درويشة....
.......
مالكي يا لليام علينا
فرقتي التحتية والدفينة
والهيدورة لي كانت زينة
ما لاقت لك تفريشة....
......
خوذي ما جاك واعفينا
وما تحرري خبزك علينا
را الدموع نشفوا من عينينا
ومول الكرش ما تزيديه كريشة....
......
يا لليام الله يهديك علينا
وعرفي الى تعشينا حتى ما تغذينا
وقتاش السعادة معاك تجينا
ونترشوا بعطرها غير رشيشة....
.......
............أحمد الناصري......