اعرف مقامك
تفرق كتير
لما تقعد ع الرصيف
ف عز الشتاء ويا الخريف
والبرد ياكلك من غير لحاف
تفرق كتير
لما تمسك بيدك رغيف
كلام سخيف
وانت قاعد ع الرصيف
مفيش غموس وتاكله حاف
تنهش فى جسمك
تقطّع هدومك
وتنسى اسمك
وكمان علومك
تشتم ف سيدك وتنفخ سمومك
قوم امشى والحق
طابور الضعاف
يا بنى ميغرّكش طولك يا هايف
الهمّ ابن عمّك
والضحك هجر الشفايف
تشوف الكنافة وعيونك تبص
ولسه انت قاعد ف همومك ترص
وريقك يسيّل
على طعم القطايف
تفرق كتير
لما تريح ع الخد إيدك
إيّاك تبرطم وتجرّح ف سيدك
وحتى الدم إن خاصم وريدك
والله دا كله ما عاد يفيدك
تفرق كتير
لما تتوه وسط الزحام
عيشتك حرام
وجودك حرام
كلامك زكام
انت أصلاً جزمة ومداس
مالكش لزمة م الأساس
يلا قوم وامشى بسرعة
قوم وارمى نفسك
تحت الترام
تفرق كتير
لما تشحت فلوسك
تغلط ف سيدك
بالجزمة يدوسك
منتاش عصامى
أصلك حرامى
تنطق بكلمة
توقع ضروسك
اسمع كلامنا لو عايز تعيش
إن قلنا مفيش
يبقى مفيش
تموت تعيش ميهمنيش
إنت حثالة
أصلك زبالة
إنت حيا الله
مرقة ف دشيش
*********
ليست هناك تعليقات:
إرسال تعليق