مقصودة....ياخال
جيتلك يا خال.....
علشان ترد الضحكة لوشوش العيال
وتحطط الناس اللي شايله
واللي طال بيها المشال
وتعشش الحلم اللي هاجج م القلوب
وتتوب الجرح اللي مش عايز يتوب
وترد ع الست اللي قاعده تقول... جمال
جيتلك يا خال.....
جيتلك وأنا بين البينين
طالق بتون الشوق تهربد ف الضلوع
مركب ما بين الوجد وما بين الدموع
يا قرشننا الأبيض زماننا اسود
يرعشني خوفي.....
رعشة الموت اللي تقتل أي حد
جايلك وجايه ورايا ناس الهد
متمسكين ف الحلم مسك المديونين ف المال
جيتلك يا خال.....
يا أبو صورة لسه سلاح ف إيد الشقيانين
بتحوش حمول الظلم عن ضهر الغلابة
بابهم ف وش الريح
ومرهم للعينين
وعصاية للعاجز وأوراق للكتابة
تلفيعة الفلاح ومنجل ف الإيدين
وسؤال ف صدر الخلق ما تلقيلوش إجابة
دور سواقي الشمس ع الليل السواد
قلع كوادي الفجر
وجدور الفساد
رجع عبيد الأرض من تاني لعباد
وارسى بمراكبنا على شطوط المحال
جيتلك يا خال.....
والعيشة سودا والمعايش ضنك
وأهل العروبة ملتمين الشوق
والكلمة ف البورصة ما تسوى فرنك
غشوها صبحت لا غنى ولا صيط
يعني كأنك يا أبوزيد ما غزيت
ولا سبت لينا رصيد ف قلب البنك
كل المصانع بتبكي
والمكان بيئن
والأرض للفلاحين
من تاني راجعه تحن
والجزارين بالمبارد كل يوم بتسن
دبابير وفوق عشنا قايمة ونايمة تزن
سيف الغلابة يا خالي....
والغلابة كتار
جاياك بطيبة قلوبها يوشوشوا الصبار
وبيبكوا ع البخت اللي مال
جيتلك يا خال
وأنا زي زرع القصاري له جدور لفة
بسترخص الضي لما بتحبسه الشبابيك
فيبيع رايات العروبة لكدابين زفة
ساحبين سفينة العروبة لبحر لا يوريك
موجه من الأمركة
بينجس الكفة
أشخط ف دمعي اللي نازل ع الخدود كرابيج
يقاوحني زي اللي عاوز يوصل الضفة
يا شمعة قايدة بضياها الحر ف الزنازين
مفتاح ف إيد الصنايعي
وحد سد الدين
مستنيين الغلابة
بطاقة التموين
وبيبكوا ع البخت اللي مال
الفاتحة على روحك يا خال
بقلم سليمان الزهيري
ليست هناك تعليقات:
إرسال تعليق