شَدّيت حَبل الفُراق
شنَقنى بالذِكرى
أمبارِح المؤلِم
بيجور على بُكره
والفِكرَه مِش نِسيان
ولا إنى أبات مَوجوع
لَكِن الحقيقه المُرَه
راحتَك طَريق مَمنوع
طَريقها رايح بَس
والرجعَه بِمُخالفَه
كان نفسى يوم تِرجَع
أتاريها كات حالفَه
ويمينها زَى طَريق
مافيهوش ولا إشارة
عَلَشان ماترجَع فيه
مِحتاجه كَفّاره
هاتصوم تلَت تيام
وتقاطِع المخالِيق
والعِند زَى الكُفر
خلّى الوَسَع بيضيق
والشوق بيتكَسَّر
والحُب بقى بَهتان
أفتَح فى باب ليها
فاتسِد هىَّ بِبان
مَلعون هذا التوهان
خَلّانى مِتكَسَّر
قَلبى اللى بَهدلنى
عَوّدنى إنى اخسَر
أهمَلت كُل الناس
علَشان ما أرضيها
وزرَعت كُل الخير
والشوق فى أراضيها
فاطرَحلى شوك ومرار
جَرّحلى إحساسى
رَوِيت بإيدى الوَرد
والوَرد كان قاسى
والأرض صَبَحِت بور
والطَرح بقى صَبار
والعود يبات مَسلول
والحَلق كُله مرار
إزّاى ينام الفِكر
والقَلب والِع نار
عمر_ألبحار
ليست هناك تعليقات:
إرسال تعليق