بقلم الشاعر أحمد سيد أحمد

يا ريتنى توبك

أنا بحسد التوب اللى حاضنك
و اللى نفسى أكون مكانه
أبقى طول العمر جنبك
تبقى نور قلبى و حنانه
يبقى كل ما فيا ليك
و ابقى عايش بين إديك
أحضنك و أميل عليك
و اقطف الورد ف أوانه
و الفرح بيكى يواتينى
يكتب الحكايات ف عينى
و يواعدنى .. و يوافينى
حزن قلبى يسيب مكانه
ترقص الدنيا ف وجودك
أبقى حر ما بين قيودك
فوق شفايفك .. فوق خدودك
ألقى عمرى و اعيش زمانه
نفسى اطير حر ف سماك
نفسى قلبى ينول رضاك
نفسى اكون دايما وراك
و انسى أيامى اللى كانوا
أحمدسيدأحمد