( ع الأصل دور )
ياللي بتظلم وانت مسرور
إوعاك تنسي دعوة مظلوم
لو خليته يوم مهموم
ليه تتكبر وعلي إيه مغرور
غرورك هيخليك دايماً موهوم
كلمتين هقولهم قبل ما أقوم
ليه تفضل في عتاب ولوم
وتخسر حواليك كل أحبابك
وبين أهلك قاطع لوصالك
ناسي سؤالك وناسي ودادك
واوعي تصاحب ناس مؤذيه
أو تبقي ضمن ناس ترزيه
واوعي تبات يوم شبعان
وجمبك فقير بيبات جعان
او من أهلك قريب تعبان
وبلاش قلبك يبقي جاحد
أو تبقي يوم ع الناس حاقد
كاره للخير وتكون ملعون
سيب الكون لرب الكون
واطلب منه يكون في العون
واوعاك تغدر يوم بصديق
وتهرب منه وقت الضيق
خليك دايماً اصيل وياه
واوعي تخون العِشره معاه
وإن حبيت ماتخونش العهد
وحافظ دايماً لو فيه وعد
واوعاك يوم تأذي جارك
وخليه دايماً هو ابقالك
واوعاك تبخل عليه بسؤالك
واختار الجار قبل الدار
واوعاك للحق مايوم تختار
ليه تعيش مهموم ليل ونهار
واوعي تكون عبيد للمال
ده عمر المال ماعمل رجال
خليك دايما عايش بكرامتك
وإوعي تدوس علي عزة نفسك
وعينك دايماً ع الأصل دور
ولما تناسب حاسب وفكر
ده الأصيل عمره ماخان
ولولاد الناس عمره ماهان
هيعيش معاك ومش طماع
وعمره ماكان سبب أوجاع
خواطر ( اشرف الدغيدي)
حقوق النشر محفوظة
ليست هناك تعليقات:
إرسال تعليق