وعتابي عليك يازمن
طبع الناس يآناس محيرني
وع اللي بشوفوا مين يصبرني
عايش غريب وسطهم
مش قادر افهم طبعهم
خدعوني بكلامهم وكدبهم
وصدقت ضحكة وشهم
الغدر والكدب غالب.طبعهم
راحوا الطيبين أهلي وناسي
وسابوني وحدي في الدنيا بآسي
وغابوا عني كمان صحابي
وكل واحد راح في وادي
والوشوش الطيبه راحت
والضحكه الصافيه حلاوتها تاهت
لما المحبه جوانا ماتت
والدنيا. خلاص مابقتش دنيا
كانت زمان بناسها الطيبه حِلوه
والفرحه صبحت محبوسه جوه
الأخ عشان يعيش بيموِّت اخوه
واللي اخواته ظلموه وسرقوه
واللي اتفقوا عليه وسجنوه
والإبن اللي بيرمي أُمه وأَبوه
هاتوا أُم اتظلمت وأب وأخ إتظلم
وشوفوا في عنيهم الحسره والألم
وضاع جوانا احساسنا بالأمان
لما الناس طمعت وغيرت الزمان
والطيبه راحت واتغير معاها المكان
الناس صبحت حيتان وديابه
للوعود والعهود دايماً كدابه
اللي عمال بيسرق في الميزان
واللي خلاَّ الأسعار جنان
واللي عايش طماع وغفلان
واللي نهب وقتل عشان المال
ناسيين في الرضا راحة بال
الصاحب مبقاش صاحب ومن صاحبه غار
والأخ صبح قآسي علي اخواته وغدار
وشموع المحبه انطفت جوه الدار
والحبيب هجر وخان من غير اعذار
والأيام بتجري بينا وبتخلص الأعمار
لا انا قادر. اعيش ياناس زيهم
ولا باسلم منهم ومن شرهم
وعتابي عليك يازمن
فنينا عمرنا من غير تمن
الشريف عشان نضيف مظلوم
ورغم تعبه حقه مهضوم
ومطبلاتي خد حقه ومعلوم
وع الوليمه مع الكبار معزوم
يالا العجب من دوول بشر
لما الظلم بين اهل الشر انتصر
العدل ضاع والحق بين الناس إنهزم
اخلاق وشهامه وعدل كله صبح معدوم
ومهما طال ظلمهم عمره ماراح يدوم
وشمس النهار عننا غابت
لما الضماير جوانا ماتت
وضاع الحلم ضاع
وزادت جوانا. الأوجاع
واللي بنشتريه يخساره باع
واتغيرت الوجوه أشكال وأشكال
وف كل مكان منافق وشمال
وتاهت ياناس وسط الزحام خطوتي
وحكايتي سرقت مني ضحكتي
ومافي غير الصبر والأمل سلوتي
يمكن تيجي ناس طيبه تِفرَّحّْ مهجتي
خواطر ( أشرف الدغيدي )
حقوق الملكية محفوظه
ليست هناك تعليقات:
إرسال تعليق