___________ انا م اعرفهوش ___________
وف نفس اللحظة اللي انا فيها
ب اخرج من هم ل حزن جديد..؛
انا لسّه مصمم
اعيش فيها
و اضحك من قلبي كأني سعيد..؛
وبرغم ان انا برَّايا زحام
جوايا وحيد..؛
شايل احلامي ف تلاجة
و مستغرب ليه حاسس ب جليد..؛
-
انا مش أسعد حالاً منك
او من غيرك
بل بالعكس..؛
انا رغم الامل اللي انا لسّه متشبس بيه
...مصاحبني اليأس ..؛
انا واخد جنب من الدنيا
وكل اللي هامِمني تعدي وبس..؛
_
ايام وشهور
وساعات ودقايق عايزة الحرق..؛
ب انام و اصحي
ب اخرج و ادخل
ب اطلع و انزل
من غير ما ب احس ب ايُّها فرق..؛
انا ب اضحك ضحك شبَه بعضه
وب احزن حزن مابيعدِّيش..؛
وب احب حاجات ما بتتحبش
و ب اسكن حضن مابيدَفِّيش..؛
و ب افارق كل اللي حاببْنِي
و امسك ف ادين عاوزة تسيبني
ومصمم امشي طريق طول عمره ماوصلنيش..؛
ب اجري وري اي بريق و سراب
و معيِّش نفسي امل كداب
انا سمكة عاشقة السنارة وخْداع الطُعْمْ
و حياتي بقت زي الماشروم من غير ولاطَعم
ب اضطر ادوس علي نفسي عشان
استطعم ناس مالهاش نكهة..؛
قفص الاصحاب
مش كله ب يبقي اصناف فاكهة..؛
_
ب اتغابَي ساعات علشان اثبت
ان انا اكتر واحد مفهوم..؛
وساعات ب اهرب من نفسي عشان
ماتجبْشي كتير علي نفسي اللوم..؛
مبسوط ب الوهم اللي انا عايشه
و مصمم اكمل كده موهوم..؛
انا عامل فاهم كل الناس
مع ان انا اصلا مش مفهوم..؛
_
وكتير ب اتعامل مع عقلي
علي ان ذكائي مابيخونِّيش..؛
ف اكتشف ان الناس شايفاني
واحد من طيبته عبيط جدا..؛
و ب اسفسط طول الوقت ب حاجة
...انا نفسي لايمكن اصدقها...
...ان الفرخة بتعرف تدَّن..؛
وب اكابر مهما ب اكون غلطان
و مهم ان انت ماتقنعنيش..؛
واخد م الدنيا كتير شلاليت
عامل قال ايه مابتوجعنيش..؛
وببص ورايا و ب اتكعبل
و اشتكي م الحظ اللي مكعبل
انا راكب راسي و ب اخبطها
ف الحيط علشان متصدَّعنيش..؛
و مشاعري ب احاول افتتها
قال ايه علشان متقيّدنيش..؛
وب اقلد كل الناس علشان
افضل بينهم
ف بعيش بملامح تشبهني..؛
انا ب اوهم نفسي ب حرية
و انا خايف اصلا تشبهني..؛
و بحارب طول الوقت عشان
الخوف يبعد مايخوفنيش..؛
وبداوي جراحي بدوسي عليها
لحد ما هيّ ماتوجعنيش..؛
ف تسيب جوايا عاهة اثرها مابيرُوحشي
انا ب اكدب طول الوقت عشان اجمل فُحشي
وعشان الناس م تكدبنيش..؛
و انا عارف في قرَارِتْ نفسي
ان الكل ماصدقنيش..؛
-
انا جسدي المسجون في مكاني..
...بيكتِّف روحي المحبوسة..؛
العُقدة اتربطت ف لساني
محتاج ل هارون و عصا موسي..؛
محتاج ناعسة...
...وانا عمري ف يوم ما ح اكون ايوب..؛
محتاج لقميص...
...يوسف وانا اصلا مش يعقوب..؛
وانا شايف محروم من بصري
حقّاني وانا عن حقي ب احِيد..؛
انا رافض ومسلم امري
انا راضي ومتمرد و عنيد..؛
وشجاع و انا خايف من قدري
وجبان و انا عايش حب جديد..؛
ناجح جدا
في حاجات كان نفسي افشل فيها
فاشل جدا
في حاجات كان نفسي انجح فيها
ادمنت حاجات
كان نفسي بجد ابطلها
زاهد في حاجات
كان نفسي بجد م ابطلهاش
صدقت حاجات
واضحالي انها كدبة شايفها..؛
كدبت حاجات
متأكد من صدق حروفها..؛
مغرم ب بعيون كارهة تشوفني
كاره لقلوب حباني بجد..؛
انا ضدِّي و متعصب لِيَّا
انا شبه الناس ومازييش حد..؛
م الاخر
انا واحد تاني
عايش جوايا و مافهمتوش...؛؛
عامل قال ايه مستلطفني
مع ان انا عمري ماحبيتهوش...؛؛
ملازمني ورافض يفارقني
مع اني انا اصلاً
م اعرفهوش...؛؛؛
****
يوسف السباعي احمد
