"نزيف"
وينزف قلبي جوايا
نزيف القلب مش جرحه ولا دموعه
نزيف القلب ترديده لصراخ جوعه للمسة إيد
نزيف القلب يوم تعرف بأن الحب مش أحاسيس
من الصلصال
بتتشكل على راحتك
على كيفك
وكفة إيدك العاشقه خطوطها تطبع التضاريس لكف القلب
ويقرا القلب طالعها
جراح. .....أفراح
وسكه للسفر والمواويل
وعمر طويل
وبنت قريبه من دمك وبتحبك
وواحده غريبه بتحبك
تشوفها ف المنام صدفه
وتديلك رقم تليفونها والعنوان
وخصلة شعر للذكرى
عشان بكره ما يقدر يبعد القلبين
وترسم فكره في عينها نهار للحب كله خيال
وتصحى فجأه من نومك
وينزف قلبك الهاني
نزيف القلب مش دمه ولا دموعه
نزيف القلب يوم ما بترسم الأحلام بتباشيره
ف سبورة هوى عمرك
وتيجي بشاورة العالم وتمحيها
وترسم تاني ملامحها
في نني العين وف الضحكه ولون الشعر
بياض الحلم هيلون سواد الشعر والسبوره
ويا الليل
ورحلة عمرك الذاكي ودمع العين
وتيجي بشاورة العالم وتمحيهم ف غمضة عين
وينزف قلبي جوايا
نزيف القلب مش دمه ولا دموعه
نزيف القلب لخضوعه لحبسة نفسه جوا ضلوع
بتتاكل ف يوم ورا يوم
ضلوع هشه
هتتفتت بطبطبة الحبيبه بإيديها فوق الصدر
بأول ريح تحاول تفتح الشباك
بقدسية صراخك جوا بحر الشعر
ورغم بأنها هشه
هتتهشم وتتبعتر وتتكسر ف فصل خريف
هيعشق قلبك المسجون لسجانه
ويحبس نفسه جوا الخوف
بقلم أحمد__الجندي
