حابي وحبيب حَبَّة عينَّا
عمره ما هيغيب يا أوزير عنّا
يا إيزيس سلامات.. واغسلي وِشِّك
في النيل.. ولا مين دا اللي يغِشِّك
حتى لو يوم حكاوينا ماعت
واقفة زنهار بميزان ماعت
والحق صريح
من غير تصريح
يا قانون العدل انزل بالسيف
واقطع رقبة أولاد الزيف
وإيدين خانت وإيدين باعت
من توت ولبابه لهاتور
لكياك فيضانك يا شهور
من طوبة لبرمودة لبشنس
طايب قمحك زي الشمس
والنيل الحر هيتوضى
في عنيكِ الحُرَّة نشيد فضة
والدنيا تغنِّي مواويله
وترج الكون
النيل إنسان
صافي وحنون وساعات مجنون
وساعات غضبان
طول عمره شباب بشباب مسكون
ولا هان
ولا خان
النيل إنسان
ــــــــــــــــــ
2013
من قصيدة (النيل إنسان)
ليست هناك تعليقات:
إرسال تعليق