تعويذة فرح .............. .................. مهداة إلى Anwar Okasha
عارف قدرك يا " انور " خالص
قلبك عيّل ، طيّب ، خالص
و عشان عارف ..
ما اقدرش اكتب عنك شطر !!
من يوم القادرة الكدابه
وجعتنا و حكمت بالبعد
وانا ليل و نهار مرزى و بادعى ..
يجازيك يا بعاد ، روح ياكلك قطر !!
سيبتك غصبن عنى وقلت يا خيبتى ..
مس القلب ف بعدك ضُر ..
وانت يا أنور ..
من بين كل العالم .. وحدك ..
رديت غيبتى !!
واما قابلتك ..
ردّيت فيّه الروح والعافيه
و دافيه مشاعرك يا ابن الإيه !!
طب إيه بتقوله ، بتعمل إيه ؟
والله ما عارف !!
لكن .. شايف ..
تعويذة فرح ف كفّينك
وانا ياللى سنين باسأل .. فينك ؟
ألاقيك فى التو و فى اللحظه ..
مشّيت الغيم
و قتلت أنين
و القلب فرشته خضار و حنين
قرّبت اتجن بأفعالك
ف اوعاك تسألنى تقول مالك !!
أنا بس اللى اسأل ، لو تسمح !!
إزاى لما جيت
راحت الاحزان ؟
وازاى لميت
جرح البستان ؟
و ازاى بتبان
هادى و مسرور ؟
واول ما تبان
بيهل النور
ياما واد عفريت !!
أنور يا جماعه " جراب حواديت "
أنور " واد بيت "
شاعر ، قوال
يهمس بالقول ..
تسمع زلزال !!
أول ما يشوفك ..
فرمان الشوف دايما حاضر !!
شبيك ، لبيك ، إحلم ، أمرك
و ف لمح العين يطفى ف جمرك
و يغوص جواك يملك روحك
و ف ثانيه يطيّب فى جروحك
و يميل يهمس لك فى ودانك ..
إسمح لى اشرب من أحزانك !!
و اقبل ظلم الدنيا عشانك !!
و اول ما تشوفه ..
الضحكه اللى ف وشه تخلى البلا ينزاح
ترتاح فى براح قلبه الواسع
و يحاجى عليك من هوا فارر
من غير إذن يخش لقلبك
حالك لو مال ..
تلقاه جنبك ..
صادق و أمين
دايما فرحان
شاكر
رضيان
يقسم فرحه معاك بزياده و ..
زى العاده ..
بيدس الحزن ف بير واسع !!
نور من برّاه ..
نور من جوّاه ..
بدنه النحفان " مشرق " ، "أنور "
تبعد ، تقرب ، مش مشكلته !!
ماتغيّرش انور ، هوّاه !!
قبل ما تحتاج له بتلقاه ..
فنان ..
إنسان ..
فى زمان ممكن يفنا العمر بحاله ..
من غير ما تقابل " إنسان " !!
شعر / على أبوسراج
